Vortaro de Vilkki & Favén

Ĉi tion mi publikigis origine (2009) en la retejo Ipernity. Mi kopiis ĉi tien la foton kun ĉiuj komentoj.

Reviziita ruĝa = verda

Joel Vilkki, Heljä Favén: Suomi-esperanto-suomi taskusanakirja [Finna-esperanta-finna poŝvortaro], eldonis Werner Söderström Osakeyhtiö 1982. ISBN 951-0-08606-1. 450 p., 9 x 12 cm.

Ĉi tiu vortaro estas plu aktuala, ĉar pli nova ne ekzistas. Oni ne plu trovas ĝin en librovendejoj, sed Esperanto-Asocio de Finnlando ankoraŭ havas kelkajn ekzemplerojn por vendi. La verko estas reviiziita eldono de la “ruĝa vortaro” de Vilkki; reviziis lia filino Heljä Favén.

Komentoj

Fernando Maia Jr.
Mi konfuziĝas, Harri. Ĉu tiu estas la pli aktuala finna-esperanto-vortaro? Aŭ ĝi estas la pli aktuala de tiu serio da vortaroj?

Harri Laine  respondis al Fernando Maia Jr.
Mi certe esprimis min malklare. Ĉi tiu vortaro estas la plej nova el ĉiuj ekzistantaj Esperanto-vortaroj por la finna lingvo kaj la sola kiun oni povas nomi ankoraŭ aktuala. Tamen, jam pasis 27 jaroj post ĝia apero, kio ne povas ne videbli. Ĉiuj aliaj vortaroj estas antaŭ longe elĉerpitaj, kaj ankaŭ ĉi tiu, laŭ mia scio, ne plu estas aĉetebla en librovendejoj, nur ĉe Esperanto-Asocio de Finnlando, vidu esperanto.fi/eldonajoj.htm .

Duon-ekzistas projekto pri nova vortaro, sed ĉar ĝi longe stagnis, ne estas saĝe antaŭdiri ion pri eventualaj rezultoj. Rete troviĝas kelkaj rimedoj: la plej bona estas la vortaro de lernu! (gratulon al la bonaj finnaj kunlaborantoj de lernu.net !). En ReVo nur tre malmultaj vortoj havas finnan tradukon.


Jen la unua eldono, “la ruĝa vortaro”

La ruĝa vortaro de Vilkki
Joel Vilkki, Suomi esperanto suomi. Eld. Werner Söderström Osakeyhtiö, 1963. 393 p. 8.5 x 12.5 cm. 


Vortaro finna-esperanta-finna, kiu aperis en la populara serio “Punaiset sanakirjat” (Ruĝaj vortaroj) de granda libroeldonejo. La serion karakterizis ĝia formato (vera poŝlibro) kaj la flekseblaj kovriloj el ruĝa plasto. Densa teksto kun malgranda litertipo ebligis iom ampleksan enhavon.