Bonhumora “blazono” de la Ĉefedelegito de UEA en Finnlando.
Donaco de nekonata malliberulo al ĈD Joel Vilkki
en la 1960-aj jaroj. – 205×297 mm.
Mi tenas mane bildon de koko, kiu staras sur globo, evidente sur terglobo. Per unu piedo ĝi tenas kvinpintan stelon, kaj la pozo kun levita kapo kaj malferma beko montras, ke ĝi estas krianta. La bildo, proksimume 20 x 30 cm, estas reliefe farita el maldika kupra lado. Ĉe la malsupra rando estas teksto “Ĉefdelegito”, kaj en la dekstra suba angulo legeblas io, kio ŝajnas du literoj kaj du ciferoj. Mi klopodas interpreti: IU-68, eble IW-68 aŭ io alia. Ne estas tute klare.
La dorsa flanko estas kartona, kaj inter la lado kaj la kartono estas io malmola, eble gipso, por solidigi kaj fortikigi la tuton. La internaĵo iom rompiĝis, ĉar mi aŭdas sekan brueton de moviĝantaj eroj, kiam mi turnas la artaĵon por rigardi la malantaŭon.
Sur la griza kartona dorso legeblas krajone aldonita teksto: “Ĉi tiun artaĵon faris iu malliberulo kaj donis al Joel Vilkki, la tiama ĉefdelegito de UEA en Finnlando”.
Joel Vilkki ( ĈD de IEL kaj UEA 1938–1971) transdonis la “ĉefdelegitan blazonon” al sia posteulo Jussi Jäntti (ĈD de UEA 1971–1973). La sekvaj ĉefdelegitoj estis unue mi (1973–1980) kaj poste Sirkka Mattlin (antaŭa nomo S. Salmivaara; 1980–1990), Heta Kesälä (1990–2005) kaj nun Päivi Saarinen (ekde 2005).
Vilkki iam rakontis al mi pri la objekto, sed mi jam forgesis multon el la detaloj. La bildo verŝajne naskiĝis en la fama malliberejo Kakola. Mi supozas, ke tie suferis sian punon esperantisto aŭ lernanto de Esperanto, kiu havis kontakton kun Vilkki. Tre kredeblas, ke Vilkki, vera helpemulo, pagis por la malliberulo membrokotizon de UEA, kaj tiu volis iel rekompenci la donacon.
Eble ne ĉiu ĉefdelegito metis aŭ metos la “blazonon” paradi en sia salono aŭ ĉe sia pordo. Mi tamen esperas, ke la simpatia kuriozaĵo donacita al Joel Vilkki ne perdiĝos, sed plu transdoniĝos de postenulo al alia en la vico de UEA-ĉefdelegitoj en Finnlando.
* * *
De kie la kokobildo?
La bildo pri krianta koko sur terglobo ŝajnas al mi tute konata, sed mi nun ne kapablas precize rekoni ĝin. Ĉu ĝi iam aperis sur kovrilo de libro? Ĉu ĝi iel rilatas al la dana Eldonejo Koko? Mi memoras ankaŭ libronomon “Koko krias jam”. Ĉu iu povas helpi?
--------------------------------
[Ĉi tio estas kopio el mia blogo en Ipernity. La sekvaj komentoj siatempe aperis sub la originalo.]
Komentoj
- Vjaĉeslav Slavik Iva…
Kia kortuŝa historio...
- Jorma Ahomäki
Saluton Harri.
Ŝajnas al mi, ke Joel Vilkki ne havis ĝenajn antaŭjuĝojn. Vere interesa estas la ŝildo. Indas mencii, ke iama kasisto de Esperanto-societo en Turku, s-ro Vaito Vihjanen (1921-1985) estis en la menciita malliberejo "Kakola" laborgvidisto (tajlorado). Krome ni notu, ke loka membro Eero Karo estis ĉefo de tiu ĉi prizono. S-ro Vihjanen ĝojigis nin per humorplenaj anekdotoj pri ĉiutaga vivo malantaŭ malliberejaj muregoj. Dankon al Harri.
Jorma Ahomäki
- Stanislaw Rynduch respondis al Jorma Ahomäki
Kara Jorma,
mi interesiĝas pri ĉiuj malliberigitaj esperantistoj. Ĉu estas konata pro kio estis Vaito Vihjanen en la maliberejo?
Multaj lernis Esperanton en maliberejo aŭ prizonoj, interalie ankaŭ Tito, sed mi ne trovis kie. Verŝajne en Maribor.
Ei kommentteja:
Lähetä kommentti